Këshilltari i Presidentit Ilir Meta, Bledar Dervishaj, komentoi në Syri Tv vendimin e Gjykatës Kushtetuese, e cila shprehej se faktet e paraqitura nga mazhoranca si shkelje për rendin dhe sigurinë publike nga kreu i shtetit, nuk përbëjnë shkelje të Kushtetutës.
Dervishaj theksoi se Gjykata Kushtetuese bëri të qartë se veprimtaria e Metës ka qenë korrekte.
“Presidenti nuk ka konsumuar asnjë shkelje, aq më pak një krim të rëndë. Kjo solli nga Kushtetuesja shfuqizimin e Kuvendit që i kërkoi gjykatës shkarkimin e kreut të shtetit. Kjo erdhi jo se Kuvendi nuk e njeh Kushtetutën, por qëllime të diktuara politikisht”, deklaroi Dervishaj.
Dervishaj tha më tej se Kuvendi u bashkua njësh me qeverinë dhe ndarja e balancimi i pushteteve nuk ekzistonte më.
“Presidenti ngeli i vetëm si autoritet kushtetues që mund të kishte autoritet të frenonte të paktën për aq sa kishte në dorë veprimtaritë ligjbërëse. Mazhoranca në mënyrë fiktive shkoi drejt një procesi shkarkimi, por që në fund e mbajti opinionin publik për 10 muaj me radhë se do shkarkohet Presidenti. Pas 10 muajsh të konsumuara energji kot, Kushtetuesja gjykoi se veprimtaria e Metës ka qenë korrekte”, tha Dervishaj.
Ndër të tjera Dervishaj deklaroi se në seancën e fundit të zhvilluar, Kuvendi paraqiti prova të pakërkuara që përbënin manipulim për të orientuar Gjykatën Kushtetuese drejt një date për caktimin e seancës plenare.
“Kemi qenë të vëmendshëm dhe të përgatitur për çdo llojë situate. Mungonte shkelja nga ana e Presidentit Ilir Meta.”-tha Dervishaj.
