Kryeministri Edi Rama vijon të sulmojë protestat qytetare kundër rritjes së çmimeve.
Në një deklaratë nga një aktivitet këtë të Mërkurë, Rama tha se “Foltoret” dhe “fallxhoret” do sjellin njerëz nga rrethet të Shtunën – kur nga mikrofoni i protestës u lajmërua një protestë marshim në kryeqytet.
“…Të atyre që ulërinë atje që shajnë, mallkojnë, sajojnë fjalë të paqena dhe s’lënë fjalë të ulëta pa thënë se duan naftë për të sjelle njerëzit nga rrethet. Të shtunën, se i shtyjnë për të Shtunën. Se duhet të angazhohen prapë foltoret dhe fallxhoret që të sjellin njerëz me atë metodën e tyre të kapjes së kush është më i verbëri. Jo, për këtë ne nuk mund ta ulim taksën e naftës. Asnjë taksë nafte nuk do preket as 100 veta siç ishin mbrëmë, po 100 mijë të vijë. Se s’është e mundur, s’është çështja se s’dua unë”, tha Rama.
“Foltorja” u quajt lëvizja e ish-kryeministri Sali Berisha pas përjashtimit nga grupi parlamentar demokrat nga Lulzim Basha, ndërsa me epitetin “fallxhore”, Rama i është drejtuar më herët Monika Kryemadhit – kryetares së LSI-së.
Rama shtoi më tej se, “kjo protestë është turp dhe do të hyjë në histori”.
“Kjo është e vetmja proteste në të gjitha vendet e NATO-s, jo të NATO-s, në Europë dhe jashtë Europës që menjëherë sapo u ndje rritja e çmimeve u organizua kundër qeverisë, për rritjen e çmimeve që solli lufta. Mungesë dinjiteti, karakteri dhe paturpësi e padijes”, deklaroi kryeministri.
Gjatë aktivitetit të sotëm, Rama foli për paketën sociale të prezantuar disa ditë më parë, por për qytetarët që vijojnë protestat si dhe disa zërave të spikatur të opinionit publik, është e pamjaftueshme.
