Detaje të reja bëhen me dije nga operacioni anti-drogë në Itali, ku mes personave të përfshirë raportohet se është dhe këngëtarja shqiptare Elsa Lila.
“Corriere della Sera” shkruan se Ela Lila menaxhonte llogaritë e grupit që merrej me trafik droge dhe se ajo është një nga personat e arrestuar. Më herët, “Il Messaggero” raportoi se këngëtarja ishte nën hetim.
Raportimi i “Corriere Della Sera”
Në artikullin e titulluar “Operacioni antidrogë, 9 persona të arrestuar për posedim dhe shpërndarje droge”, “Corriere” shkruan:
Grupi përdorte një lokal në Acilia si bazën e tyre të operimit ku mbanin takime për të menaxhuar trafikun e drogës në lagje të ndryshme të Romës. Droga ruhej në një magazinë klandestine në zonën e Torrevecchia edhe nëse kupola ishte në Torpignattara dhe në Marranella. Këtë zbuluan hetuesit e policisë, të cilët në orët e para të mëngjesit të së Mërkurës kanë ekzekutuar nëntë urdhra arresti me burg për trafik droge kryer në kuadrin e grupit të strukturuar kriminal.
Gjatë hetimeve u sekuestrua mbi një kuintal drogë. Hetimi u ndoq nga hetuesit e Policisë së Romës së bashku me kolegët e Viterbos. Grupi drejtohej nga dy persona, një romak dhe një shqiptar: ky i fundit aktualisht është në kërkim. Po ashtu rezulton në kërkim edhe jashtë vendit (Italisë). Ishin ata që menaxhonin tregtinë e hashashit dhe marijuanës që sillej në Romë dhe më pas shpërndahej në territor, por qendra e operacioneve të organizatës ishte në Acilia nga ku niseshin porositë për filialet e shpërndara në të gjithë kryeqytetin.
Mes të arrestuarve është edhe këngëtarja shqiptare Elsa Lila, 41 vjeçe, e njohur edhe në Itali: ajo kishte për detyrë të menaxhonte llogaritë e grupit. I ndaluar edhe Petrit Bardi, gjithashtu shqiptar, i përfshirë më herët në fashikujt hetimore bashkë me Fabrizio Piscitelli-n, i njohur si “Diabolik”, kreu i “Ultrave” (tifozë) të Lazio-s, i vrarë në gusht 2019. Katër persona nuk janë vënë në pranga ende: një prej tyre ka vdekur, tre janë në kërkim: dy shqiptarë dhe një romak.
Pamje nga aksioni i autoriteteve italiane
