Afër 3 milionë ukrainas përllogaritet të jenë larguar nga vendi i tyre si emigrantë luftë për shkak të sulmit nga Rusia. Disa prej tyre kanë mbërritur edhe në Shqipëri. Një nënë me dy fëmijë që po strehohet në Vlorë tregon tmerrin që kanë përjetuar dhe jetën tashmë me sytë nga Kievi ku kanë lënë pas gjithçka kishin.
Kseniia Breus jetonte e qetë në Kiev së bashku me dy fëmijët e saj dhe bashkëshortin deri mëngjesin e 24 shkurtit, kur trupat ruse nisën pushtimin e Ukrainës.
“Atë mëngjes unë telefonova bashkëshortin dhe i thashë se lufta ka filluar. Ishte ora 5:00 e mëngjesit”. Disa ditë më parë mori dy vajzat e saj dhe la shtëpinë e saj bashkë me bashkëshortin, i cili po lufton në mbrojtje të atdheut.
Tanimë gjendet në Vlorë, e sigurtë për jetën, por e pasigurtë për vendin e saj. “Në Kiev ishim afër vendeve ku kanë ndodhur shpërthimet dhe kam dëgjuar gjithçka. Unë dhe fëmijët e mi kemi qenë në vende të ndryshme, si Moldavi, Bullgari, Maqedoni dhe kemi qëndruar në këto shtete për 2 ose 3 ditë dhe tani jemi këtu në Shqipëri”. Situatën në Ukrainë e quan të frikshme.
“Në Ukrainë do të thoja që situata nuk është e mirë sepse është vërtet e frikshme. Për fëmijët tanë është një problem, për të ardhmen e tyre, pasi kanë parë se si shtëpitë e tyre janë djegur. Ata kanë fjetur jashtë shtëpive, sepse nuk kishim bunkerë, se nuk ishim të përgatitur për luftën”.
Veç Kseniia Breus dhe dy vajzave dhe një tjetër grua me fëmijën e saj dhe një burrë i sëmurë kanë zgjedhur të strehohen në Vlorë falë kontakteve të mëparshme me ukrainas që jetojnë në Shqipëri.
