Ish-Kryeministri Sali Berisha akuzoi ambasadoren amerikane në Tiranë, Yuri Kim, se ka marrë rolin e guvernatores në Shqipëri.
Berisha tha se kur guvernatorët, jo ambasadorët, marrin në patronazh Qeverinë, vendi shkon poshtë e më poshtë.
“Ekziston një dosje që i ka bërë skanimin më të mirë këtij regjimi. I është bërë skanimi përmes një telefoni “BQ”, i cili është një telefon pa kartë, që është përdorur nga qeveritarët tanë. Kanë folur me organizatat kriminale, dhe po ju them se përmes këtyre telefonave specialë, jo këtu po jashtë, janë porositur edhe vrasje dhe po ju them unë se ky është një tsunam i nëndheshëm”, tha Berisha.
Sipas ish-Kryeministrit, janë zbardhur lidhjet kriminale vertikale me krimin.
“Janë telefona që kushtonin 1400 euro në vit dhe pas 1 viti hidheshin dhe ky është kurthi i artë. Unë e dija që ishte aplikacion ky, por ky është një telefon i veçantë”, tha Berisha.
