Armando Duka është zgjedhur për një tjetër mandat 4-vjeçar në krye të Federatës Shqiptare të Futbollit.
Duka mori 37 vota, Sulejman Starova 4, ndërsa Shako Hoxha asnjë. Dy vota u shpallën të pavlefshme.
Koço Kokëdhima, drejtues i Komisionit të verifikimit, teksa njoftoi rezultatin e votimit, u shpreh se “nga 43 votues të vlefshëm pjesëmarrës së rregullt në votim, 2 fleta ishin të pavlefshme për gabime teknike që kanë prekur konturet e kutisë. Katër vota për Sulejman Starovën. Diferenca prej 37 votash më shumë se sa kuorumi i nevojshëm e shpallin Armando Duka presidentin e FSHF-së”.
Të pranishëm në këtë Asamble që u zhvillua në ambientet e “Shtëpisë së Futbollit” ishin 43 nga 55 anëtarë.
Duka: Do jem i vëmendshëm ndaj kritikave
Pas shpalljes së rezultatit, fjalën e mori Armand Duka, i cili premtoi se do të jetë i vëmendshëm ndaj kritikave.
“Jam vërtet i emocionuar, por në të njëjtën kohë edhe i obliguar për këtë votëbesim. Padyshim që secili nga ju përveç votës e ka dhe një vërejtje për mua. Por jo vetëm ju. Edhe ata që nuk janë në këtë sallë, sportistë trajnerë, tifozë. Dhe ju garantoj që të gjitha këto vërejtje që i kam dëgjuar dhe i vazhdoj ti dëgjoj do ti respektoj, do ti mbaj shënim dhe do mundohet ti korrigjoj të pakën gjatë këtij katërvjeçari drejtimi të Federatës Shqiptare të Futbollit”, tha Duka.
“Në të njëjtën kohë kam dëgjuar dhe vazhdoj të dëgjoj baltë shpifje ofendime, Ju siguroj se do ti shmang ato ashtu si vetë loja jonë, me sportivitet”, shtoi ai.
“Sot është një ditë e mbarë dhe unë dëshiroj pas një periudhe të vështirë, pas një fushate që ju e keni ndjekur që ti lëmë pas ça kemi kaluar gjatë këtyre dy muajve. Dëshiroj që bashkë me ju, bashkë me ata që nuk janë në këtë sallë, bashkë me të gjithë aktorët dhe faktorët e vendit të kontribuojmë. Të derdhim gjithë energjitë tona pozitive për zhvillimin e futbollit dhe mirë organizimin e institucionit tonë qendror FSHF. Ju falënderoj për mbështetjen dhe garantoj se do jem në shërbimin tuaj”, tha më tej Duka.
Sot, u zgjodhën dhe anëtaret e komitetit ekzekutiv të FSHF-së.
https://www.youtube.com/watch?v=05s4OK6OmZk
Mbledhja e sotme e Asamblesë së Përgjithshme të FSHF erdhi në frymën e konfliktit, teksa gazetari Dritan Shakohoxha, që ishte kandidatë për drejtues të FSHF, nuk ishte prezent. Në mbledhje u njoftua po ashtu se delegatët e Shoqatës Tirana nuk ishin prezent.
Shakohoxha: Zgjedhjet për kreun e FSHF-së, të paligjshme
Kandidati për President i FSHF-së, Dritan Shakohoxha reagoi lidhur me mbledhjen e Asamblesë së FSHF-së, që rizgjodhi Armand Dukën president të saj.
Ai e quajti votimin të paligjshëm.
“Siç e kam deklaruar edhe dje, unë do të vazhdoj betejën ligjore. Besoj shumë që votimi i sotëm nuk do të legjitimohet. FSHF ka përdorur politikën e faktit të kryer e cila mund t’i duket me vlerë sot, por ditët në vijim do e shohim të gjithë që do jetë e pa vlerë. Gjykatat kanë folur dhe do flasin përsëri besoj, duke ruajtur të njëjtin standart si në 2 rastet e mëparshme. Në fund, drejtësia do vendoset dhe futbolli do flasë me votat e anëtarëve të familjes tonë”, u shpreh Shakohoxha për mediat.
Në zgjedhjet e sotme, Shakohoxha nuk mori asnjë votë.
***
Lexo edhe:
LIVE – Nis Asambleja e Përgjithshme për zgjedhjet e presidentit të ri në FSHF
