Kryeministri Edi Rama vijon edhe përçmon mijëra qytetarë që protestojnë anembanë vendit lidhur me rritjen e çmimeve nga karburantet deri te produktet ushqimore bazë.
Në protestë janë përfshirë edhe grupet e interesit, ndërsa Rama ka njoftuar se ‘Paketa e Rezistencës Sociale’ që do u jepet si ndihmë familjeve të varfëra dhe biznesit të vogël do të jetë 3.3 miliardë lekë.
Një qytetar shkruan se meritë që sot qeveria po reagon kanë vetëm protestat qytetare, ndërkohë në përgjigjen e tij Rama e ka cilësuar protestën një turp të madh, duke theksuar se po të ishte për këtë revoltë ai nuk do të lëvizte as gishtin e vogël.
Por pavarësisht etiketimeve, përçmimeve apo komenteve që bën lidhur me reagimin qytetar, fakt është se Edi Rama u detyrua të ndryshojë qëndrim pas protestave, pasi në ditën e parë i kërkoi qytetarëve të shtrëngonin dhëmbët, ta përballonin me dinjitet krizën që vjen si pasojë e luftës në Ukrainë dhe të mos përdorin shumë makinat. Të njëjtin qëndrim mbajti edhe ministrja Belinda Balluku,e cila u shfaq në krah të Edi Ramës, ndërsa sot kryeson Komitetin që cakton çmimet e karburanteve.
