Elvis Plori do të drejtojë Vllazninë të paktën deri në fundin e këtij sezoni. Ky është vendimi i drejtuesve të klubit shkodran pas shkarkimit nga detyra të teknikut Thomas Brdariç nga pankina e kuqebluve.
Plori ka qenë ndihmësi i Brdariç në këtë vit e gjysmë dhe padyshim që njeh shumë mirë ekipin. Por ka lindur tashmë nevoja që edhe ai të ketë një “krah të djathtë” në këtë aventurë ku do të synojë që kuqeblutë t’i mbajë në zonën e Europës, apo të sigurojë përsëri Kupën si një edicion më parë.
“Panorama Sport” ka mësuar se klubi ka gjetur një zgjidhje “në shtëpi”, duke i besuar rolin e ndihmësit një emri të njohur të futbollit shkodran si Auron Miloti. Ky i fundit, këtë vit ka qenë në rolin e skautit të Vllaznisë dhe ka ndihmuar në afrimin e disa lojtarëve në klub apo duke vëzhguar të rinjtë, por tani e tutje, ai do të jetë përkrah Plorit në këtë detyrë të re.
