Kryeministri Edi Rama deklaroi këtë të Hënë se qeveria shqiptare po mbron qytetarët si asnjë qeveri tjetër në Rajon e Europë, për sa i përket çmimit të energjisë elektrike.
Në një takim me pensionistë, transmetuar në faqen e tij në FB, Rama ripërsëriti se qeveria po paguan 7-fish për çdo familje dhe biznes të vogël në mënyrë që atyre të mos u faturohet çmimi aktual i tregut.
Ai tha se në këtë mënyrë qeveria po vendos një “mburojë financiare” nga rritja e çmimit të energjisë elektrike për 4.260 familje dhe 95.000 biznese të vogla.
“Këtë s’po e bën asnjë qeveri tjetër as në Europë as në rajon. Kanë rritur çmimin e energjisë dhe ngrohjes se ngrohja vjen me gaz në shumë vende. Shumë kolegë më thonë – kjo është çmenduri financiare, por sipas nesh, është më çmenduri që pas tërmetit dhe pandemisë, edhe kriza e pandemisë ti faturohet njerëzve”, u shpreh kreu i qeverisë.
Rama lajmëroi se në faturën e ardhshme të energjisë elektrike, do ketë edhe tregues se sa është çmimi i tregut të energjisë dhe sa po amortizon qeveria.
Protestat për rritjen e çmimeve i quajti “turp kombëtar”.
“Për turp që protestohet që në ditët e parë të luftës për pasojat e luftës”, tha Rama.
Sipas tij, “s’ka pasur Shqipëria qeveri më të vëmendshme dhe të respektueshme ndaj protestave se këto 8 vite e kusur”.
Madje, ai shtoi se protestat për rritjen e çmimeve mund ti shkojnë për shtat interesit të Moskës.
“Si mund të jemi ne kaq pa dinjitet, kaq pa moral, kaq pa logjikë. Këtu ka të bëjë me një kuturisje të turpshme që fyen e fyen kombin shqiptar dhe popullin shqiptar në dinjitetin e vet se shqiptarët nuk janë njerëz kaq të lidhur me zorrët, ndërkohë që atje (në Ukrainë) të tjerët po lënë jetën e po shkatërrohen totalisht”, tha Rama.
Protestat nga ana tjetër janë zhvilluar në Tiranë për të pestën ditë radhazi të Dielën dhe janë lajmëruar edhe ditët në vijim. Protesta janë zhvilluar pas rritjes së çmimeve edhe në qytete të tjera të vendit.
Lexo edhe:
Rama: Ne nuk na e ka dhënë Zoti naftën
Balluku: Kompanitë e transport urban dhe ndërqytetas do kompensohen me 100 lekë për litër me naftën
