Lufta në Ukrainë vijon me intensitet të lartë, ndërsa ka dëme të shumta në civilë.
Këtë të Diel humbi jetën në Irpin, një qytet jo shumë larg Kievit, Brent Renaud, gazetar i New York Times. Autoritetet ukrainase e kanë konfirmuar një lajm të këtillë duke bërë publike kartën e tij të shtypit dhe pasaportën amerikane.
Gazetari është fitues i çmimeve Peabody dhe DuPont dhe i njohur botërisht për shkrimin e historive humanitare nga zonat e konfliktit prej më shumë se dy dekadash.
Shefi i NATO-s Jens Stoltenberg ka paralajmëruar për përkeqësim të situatës në Ukrainë. Ai tha se pret një intensifikim të mëtejshëm të luftimeve dhe krizës humanitare. Sipas kreut të aleancës Veri-Atlantike ukrainasit po i rezistonin forcave ruse me guxim dhe vendosmëri, por ditët e ardhshme mund të përkeqësohen.
Rusët ndërkaq kanë bombarduar në afërsi të kufirit me Poloninë, që ka sjellë edhe shqetësim më të madh për vendet anëtare të NATO-s.
Sipas ish-kreut të Shtëpisë së Bardhë Donald Trump Ukraina mund të kthehet në një makth për të gjithë botën, në Luftën e tretë Botërore.
Sipas ministrit të Jashtëm turk Cavushollu, është në horizont mundësia e një takimi mes Vladimir Putinit dhe homologut të tij ukrainas Zelensky.
Sa i përket sanksioneve të forta ekonomike të vendosura nga Perëndimi ndaj Rusisë, kjo e fundit po kërkon ndihmë nga Kina për të mbështetur ekonominë e saj. Moska thotë se Perëndimi ka ngrirë thuajse gjysmën e rezervave të saj të valutës dhe arit.
Për luftën dhe tragjeditë e saj në Ukrainë ka reaguar edhe Papa Françesku në meshën e kësaj të diele ku ka bërë thirrje për t’i dhënë fund “masakrës” dhe duke dënuar “sulmin e armatosur të papranueshëm” të Rusisë ndaj fqinjit të saj.
Rusët ndërkaq, në qytetet që kanë arritur të marrin, sipas raporteve të medieve, kanë vënë në pushtet njerëzit e tyre. Raportohet nga mediet ukrainase se ata kanë vënë një kryebashkiak të ri në qytetin Melitopol të Ukrainës juglindore, pasi kryetari i mëparshëm Ivan Fedorov thuhet se u rrëmbye nga vetë trupat ruse.
