I emëruar nga Lulzim Basha si kryetar i degës së PD Fier, Agron Kapllanaj, ka propozuar në mbledhjen e Kolegjit të Kryetarëve, se duhet të krijohet një komision i përbashkët për të bashkuar demokratët.
Ky është një nga propozimet që kanë hedhur mbështetësit më të afërt të Lulzim Bashës, të cilit po i kërkohet largimi nga PD, por që vetë ai nuk pranon dorëheqjen, ndërsa shprehet se është dakort për të bërë një hap pas, por pa sqaruar se çfarë do të thotë kjo, sipas tij.
“PD të drejtohet nga një Komision deri në zgjedhje, edhe nëse ata të Foltores nuk pranojnë. Vendimi i 9 shtatorit për Sali Berishën nuk ndryshon, por ne duhet të gjejmë një mekanizem për t’u bashkuar.
Propozimet që ne bëjmë me ju i diskutojmë. Njerëzit kanë frikë të flasin kundër Sali Berishës.
Rruga më e thjeshtë është të hapim garën në PD. Të lëmë datën e zgjedhjeve dhe të hyjmë në zgjedhje. A na bën mirë kjo? Mendoj se jo. A i bashkon demokratët kjo, ndoshta do i dëmtojë më shume, do cahet më shumë.
Mund të ngremë një komision me 10 veta, dhe ne bëjmë një veprim për të bashkuar demokratët 5 anëtarë nga PD dhe i lëmë afat Foltores të sjellë 5 emrat e saj. Natyrisht pa Berishen dhe Bashën”, tha ai.
