Aspirant Dinoshi, 36 vjeç, u arrestua ditën e sotme në pikën kufitare “Qafë Thanë” teksa po tentonte të kalonte kufirin.
Sipas informacioneve nga policia e Pogradecit, ky shtetas ishte i shpallur në kërkim pasi ishte dënuar me 5 vite burg nga gjykata e Korçës për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
Vendimi është dhënë në datë 15 mars 2016.
Njoftimi i Plotë:
Qafë Thanë/Pogradec
Policia Kufitare e Qafë Thanës në bashkëpunim me Komisariatin e Policisë Pogradec, ndalojnë një shtetas të dënuar me 5 vite burg për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
Shërbimet e Stacionit të Policisë Kufitare Qafë Thanë, në dalje të Republikës së Shqipërisë, bënë ndalimin e shtetasit në kërkim Aspirant Dinoshi, 36 vjeç, banues në fshatin Vërdovë, Pogradec.
Gjykata e Rrethit Gjyqësor Korçë, me vendimin e datës 15.03.2016, e ka dënuar këtë shtetas me 5 vite burg për veprat penale të lartpërmendura.
Veprimet e mëtejshme në lidhje me këtë rast, u kryen nga specialistët për Hetimin e Krimeve në Komisariatin e Policisë Pogradec, të cilët bënë ekzekutimin e urdhrit të Prokurorisë pranë Gjykatës së Shkallës së Parë Korçë.
