Pesë persona janë proceduar penalisht nga policia e Beratit, lidhur me protestën e zhvilluar dje në qytet, kundër rritjes së çmimeve.
Protestuesit e proceduar akuzohen nga policia se penguan qarkullimin e automjeteve duke bllokuar rrugën kryesore urbane “Antipatrea” dhe nuk iu bindën urdhrit të punonjësve të Policisë.
“Specialistët për Hetimin e Krimeve në Komisariatin e Policisë Berat proceduan penalisht për veprat penale “Mosbindja ndaj urdhrit të punonjësit të policisë së rendit publik”, “Organizimi dhe pjesëmarrja në grumbullime e manifestime të paligjshme” dhe “Pengimi i qarkullimit të mjeteve të transportit”, shtetasit: A.A., 30 vjeç, A.R., 29 vjeç, E.Z., 32 vjeç, B.M., 28 vjeç dhe R.D., 28 vjeç, pasi ditën e djeshme, kanë penguar qarkullimin e automjeteve duke bllokuar rrugën kryesore urbane “Antipatrea””, njofton policia.
“Drejtoria Vendore e Policisë Berat apelon për të gjithë qytetarët që të mos bllokojnë lëvizjen e lirë të mjeteve dhe qytetarëve, sepse do të përballen me forcën e ligjit”, thuhet më tej në njoftim.
