Qytetarët janë alarmuar së fundmi sa i përket rritjes së çmimeve të produkteve të shportës.
Në fshatrat e Bulqizës qytetarët po përdorin misrin e bagëtive për t’u ushqyer vetë, pasi nuk përballojnë dot çmimin e lartë të miellit të grurit dhe i frikësohen një krize ushqimore.
Të gjendur përpara kësaj situate, ata i janë drejtuar mullinjve për të bluar misër, në mënyrë që të kenë rezerva ushqimore.
Ismet Hidri, mullixhi nga fshati Valikardh i Bulqizës, tregon se këtë fluks se ka vënë re më parë.
“Tani në ketë kohë krize po vijnë me blu dhe misrin e kuq që është për bagëtitë, tani e bluajnë për të ngrënë. Me keq nuk ka ku të shkojë më”.
Sipas tij, çmimet janë të papërballueshme dhe banorët po ndajnë drithrat me bagëtinë.
“Miell nuk ka, mielli ka shkuar 85 mijë lekë thesi. Me këtë çmim që ka arritur nafta nuk punohet më toka. Sot po e bluajnë të gjithë, po e mbajnë për rezerva. Nuk kanë njerëzit, po detyrohen të bluajnë miellin e kuq.”
Pavarësisht kërkesës në rritje, Ismeti shprehet se nuk ka ndryshuar çmimet për të shfrytëzuar situatën.
Çmimi i miellit ka shkuar në 8500 lekë të rinj për një kuintal.
