Kryeministri Edi Rama zgjodhi të provokojë sot qytetarët që prej 3 ditësh janë organizuar dhe po protestojnë në shumicën e qyteteve të vendit duke shprehur revoltën e tyre kundër rritjes së çmimeve.
Ndërsa protesta ka hyrë në ditën e 3-të, Rama në një postim në rrjet tha se protestuesit nuk janë populli, janë një pakicë, ndërsa akuzoi opozitën si organizatore të protestave.
Në fakt prej 3 ditësh ata që protestojnë në Tiranë, Shkodër, Lezhë, Berat, Korçë, Durrës, Lushnje, janë qytetarë që e kanë shprehur qartë revoltën e tyre, ndërsa i kërkojnë Edi Ramës ti kompensojë për rritjen e çmimeve nga imputet bujqësore, te nafta e derivatet e saj, dhe për të vijuar me ushqimet e shportës.
Kundrejt kërkesave të protestuesve Rama ka zgjedhur propagandë, show dhe më pas udhëton herë në Dubai dhe herë në Turqi, nga ku shfaqet duke përqafuar Presidentin Erdogan, apo duke bërë batuta në drejtim të BE-së.
Në fakt atë që Rama po e trajton si diçka të parëndësishme ose që ata qytetarë po përdoren politikisht, e ka detyruar Kryeministrin që të blindojë selinë e Kryeministrisë.
Nga moenti që protestuesit janë larguar sot nga bulevardi “Dëshmorët e Kombit”, nisi marrja e masave për blindimin e dyerve te godina qeveritare, ndërkohë që deri më tani protestat kanë qenë tejet paqësore dhe e vetmja dhunë e përdorur është ajo e policisë ndaj qytetarëve.
Atëherë kur pohon se ata që protestojnë janë pakicë dhe s´janë popull, pse ka frikë Edi Rama nga protesta që do të mbahet të shtunën, e cila nis në orën 11:00 në sheshin Skënderbej dhe më pas protestuesit marshojnë drejt godinës qeveritare?
Duket se Kryeministri nuk është aq i bindur në ato që përpiqet të shpërndajë në rrjetet sociale, kur ato mijëra qytetarë që janë derdhur në rrugë dhe sheshe nuk i quan popull, i konsideron pakicë dhe në fund thotë se po përdoren nga “gratat” dhe “non gratat”.
