“Çmimet dyfishohen, Rama pasurohet”, ishin thirrjet e disa qindra protestusve që janë mbledhur në ditën e dytë të protestës qytetare në bulevardin “Dëshmorët e Kombit”, para Kryeministrisë.
Një prej qytetarëve, organizator i protestës, tha se është e papranueshme që Kryeministri tenton të dialogojë me qytetarët përmes rrjeteve sociale.
“Ja ku janë qytetarët, në shesh e rrugë duke protestuar. Si shpjegohet që pas protestës sonë u ul çmimi i naftës? Pse nuk kompensohen shqiptarët për çmimet e rritura”, tha ai.
Një tjetër protestuese ka ironizuar ministren Belinda Balluku, e cila dy ditë më parë tha se “qytetarët duhet të ecin në këmbë, mos shkojnë te furra e bukës me makinë”.
“E dini pse thotë Belinda kështu? Sepse gjysma e atyre parave shkojnë në xhepat e qeveritarëve dhe oligarkëve të lidhur me to”, tha aktivistja.
Aktori Florian Binaj tha se nga protesta e djeshme jo vetëm u ul çmimi i naftës, por edhe erdhi Edi Rama nga Dubai.
“Po ka edhe më keq, sepse në politikën shqiptare kemi disa që kanë hyrë që kur ishte Bushi plak, iku Bushi erdhi çuni Bushit, iku ai, erdhi tjetri, ndërsa ato vazhodjnë ende të rrinë në politikën shqiptare”, tha Binaj.
Njëkohësisht me protestën në Tiranë, po zhvillohen protesta qytetare kundër rritjes së çmimeve në Shkodër e Kukës, të cilët kanë bllokuar edhe rrugën e Kombit me automjete.
