Trajneri i Partizanit, Dritan Mehmeti ishte i ftuar në emisionin “Sport News” me gazetaren Enxhi Biba. Tekniku i të kuqve foli për eksperiencën e tij tek kryeqytetasit, tek disa lojtarë në veçanti , por dhe tek trajnerët e huaj që e motivojnë.
Çdo të thotë të drejtosh një klub si Partizani?
“Unë kam qenë pjesë e Partizanit prej shumë kohësh dhe kur u bëra trajner ka qenë një situatë jo shumë e mirë përsa i përket sezonit. Skuadra është ndërtuar për kampion dhe të drejtosh një skuadër si Partizani është maja e futbollit shqiptar dhe e kam detyrim dhe krenari që e prezantoj këtë skuadër.”
Derbi me Tiranën
“Ishte një ndjenjë e paimagjinueshme, një kënaqësi e veçantë duke patur parasysh koreografinë e tifozërisë sonë. Futbolli t’i jep këto emocione dhe mendoj se kemi kaluar një derbi ku meritonim diçka më shumë. Më erdhi keq sepse ishte një ndeshje që duhet ta kishim fituar.”
Diferenca mes këtyre dy ekipeve
“Tirana ka pasur një ekuilibër për sa i përket menaxhimit të skuadrës. Ka pasur pak largime dhe afrime, duke ruajtur ekuilibrat në skuadër. Partizani ka pasur tranzicion pasi ka larguar pothuajse një skuadër. Jemi në ndërtim e sipër. Pikët janë, por në lojë Partizani tregoi që është aty ku duhet.”
Çështja titull
“Mendoj që titulli nuk është i sigurtë. Tirana është më afër, por ka akoma dhe shumë javë në kampionat. Nuk është zgjidhur akoma dhe kampionati është i paparashikueshëm dhe e shikojmë që dhe skuadrat e fund tabelës janë shumë të vështira për tu mundur. Do të vazhdojë deri në javët e fundit për të parë se kush do të shkojë në Europë dhe kush do të dalë jashtë Superligës.”
Kupa e Shqipërisë
“Mendoj që të treja skuadrat që kishim në short meritojnë një respekt të veçantë. Përsa i përket shortit me Vllazninë, ata kanë individualitete dhe janë skuadër shumë e mirë. Është një short i vështirë. Janë dy ndeshje dhe na jep qetësi që t’i menaxhojmë. Nuk mendojmë afatgjatë, por plane afat shkurta pasi duhet të jemi në ekuilibër. Për momentin mendojmë për ndeshjen me Egnatian pastaj t’i japim rëndësinë e duhur Kupës kur t’i vijë koha.”
A mjafton vetëm Europa për të shpëtuar sezonin e Partizanit?
“Është një objektiv minimal për sa i përket investimit të presidentit për skuadrën. Kushtet janë komode. Duhet që i gjithë klubi të përqendrohet në maksimum pasi jemi në momentin final të kampionatit dhe nuk na lejohet hap fals.”
Gjendja e Kallakut
“Kallaku është një lojtar të cilit i dihen vlerat. Jam munduar ta përshtas taktikën në varësi të Kallakut për ai erdhi në janar dhe do kohë përshtatja,. Nuk ka qenë në formën optimale. Ka kaluar kovivdin dhe i ka lënë pasoja. Kërkon të jap kontributin dhe është lojtar pozitiv.”
Xhuliano Skuka, i krahasuar nga Ledio Pano si Armando Broja i kampionatit shqiptar
“Duke pasur parasysh Brojën dhe Ledio Panon, nuk i bën mirë që e krahason me të tillë lojtarë, sepse Skuka duhet të rrijë me këmbë në tokë sepse nuk ka arritur koma në atë nivel. Është një shans që të vjen një herë në jetë. Ka nevojë për të punuar. E kam evidentuar që nga Kategoria e Parë dhe te Dinamo. I bëra kërkesën në momentin që ishte i lirë edhe e pozicionova aty ku jep më mirë. Shpresojmë të vazhdoj me këtë ritëm sepse mendoj që deri tani s’ka bërë asgjë.”
E ardhmja
“Për të qenë i sinqertë nuk kam kushte me drejtuesit sepse jam pjesë e klubit. Në momentin që më kanë dhënë skuadrën nuk më kanë dhënë objektiv. Më besuan që të nxjerr skuadrën nga kjo situatë. Besoj se jam i fokusuar vetëm tek punë që Partizani të marrë objektivin më minimal. Marrëdhënia me presidentin nuk janë letrat apo kontratat, thjesht një marrëdhënie kofidenciale. Shkon përtej kontratave.”
Krahasimi me Piolin
“Për të qenë i sinqertë e kam vënë re këtë ngjashmëri, megjithatë ka qenë koincidencë. Unë përfaqësoj ngjyrat e Partizanit dhe përpos modelit të flokëve që kam me trajnerin e Milanit, unë përfaqësoj këtë ekip. Në kurset që kemi bërë për trajner, Franko Ferrara ka pas thënë që trajneri duhet të jetë kopjues dhe krijues. Një ndër trajnerët që e kam përzemër është edhe Pioli, por më shumë anoj nga Simeone i Atletiko Madridit, por dhe tek Guardiola dhe tek Klop.”
