Lulzim Basha ka pranuar për herë të parë humbjen në zgjedhjet e 6 Marsit – kur PD e drejtuar prej tij doli forcë e tretë në 5 nga 6 bashki.
Në një prononcim për gazetarët, Basha tha se “kemi nisur konsultimet për një reflektim të thellë për humbjen e 6 marsit”.
Ai tha se menjëherë pas zgjedhjeve, PD ka mbledhur strukturat dhe mbledhjet do vijojnë edhe ditët në vijim.
“Ka pasur mbledhje, do vijojmë me mbledhjet e marrjen përgjegjësisë, do merret përgjegjësi nga unë i pari”, tha Basha.
I pyetur se sa do të zgjasë procesi i konsultimit apo nëse do të jepte dorëheqjen, Basha nuk tha një përgjigje konkrete, por shtoi se është i gatshëm të bëjë çdo gjë për interesin më të mirë të demokratëve.
“Pa u ulur dhe folur s’mund të them ça do ndodhë. Jemi në një proces reflektimi, duhet të respektojmë ata njerëz. Proces i thellë i reflektimit do vijojë me një synim: interesi i demokratëve pa dallim. Unë jam gati të bëj çdo gjë në interesin më të mirë të PD-së. Por duhet të kini pak durim se ti paragjykojmë apo ti paraprimë ngjarjet s’është e mençur. Ju siguroj që demokratët do marrin në dorë fatin e tyre. PD do dalë nga ky proces e fortë dhe e bashkuar”, u shpreh Basha.
“Jam i gatshëm të ndërmarr çdo hap që PD të jetë e fortë dhe e bashkuar. Nga humbja e 6 marsit mos të humbasim mësimin e madh: Që të jemi sa më të fortë dhe sa më të bashkuar përballë këtij regjimi”, shtoi ai.
