Përfaqësuesi i Shoqatës së Hidrokarbureve, Luigj Aliaj, ka folur në emisionin ‘Opinion’ për rritjen e menjëhershme të çmimit të naftës. Aliaj thotë se rezervat e sigurisë detyrojnë vetëm që të ketë furnizim tregu, por jo të garantojë çmimin.
“Rezervat e sigurisë na detyrojnë që ne të garantojmë tregun fizikisht me furnizim, por jo me çmim, sepse është e pamundur. Në doganën e Durrësit të investigojnë të shikojnë, online në momentin që ti do të ngarkosh një bot të furnizosh pesë pika telefonon, ta mbyllin në Londër, ta mbyllin faturën dhe ta sjellin faturën me çmimin online të momentit, kështu furnizojnë depozitat.
Derisa ngarkohet në autobot për tu hedhur në treg nafta qarkullon në përgjegjësin e tredarve, pra vjen në Durrës si pronësi më përket mua por vlerën dhe pagesën e transferon në momentin që unë e thërras. Pra është online, nuk është e mbyllur në vlera”, tha Aliaj.
Këto çmime do të pësojnë luhatje të vazhdueshme, shpjegon përfaqësuesi i Shoqatës së Hidrokarbureve, Luigj Aliaj. Ky i fundit shprehet se këto çmime pritet të normalizohen në muajin prill dhe vlera e naftës do të zbresë në 180-190 Lekë për litër.
“Çmimet gjatë kësaj periudhe do të kenë shumë goditje. Në rastin më të keq, brenda Prillit çmimet do stabilizohen, gati aty para luftës, aty te 180, 190 lekë.
Nafta është një bursë ose dyqan virtual që kërkesa dhe oferta lëvizin 24 orë. Ky treg global kërkon 100 milion fuçi në ditë për gjithë botën. Ky është çmim botëror. Rusia prodhues është i dyti, eksportues i treti.
Bllokimi i naftës ruse akoma s’ka ndodhur. Por e ka rritur mendimi, paniku. Gjithçka mund të jetë e përkohshme”, u shpreh Luigj Aliaj.
