Kandidatët humbës të Lulzim Bashës në zgjedhjet e 6 marsit janë shprehur kundër largimit të tij nga PD. Sipas tyre, Basha nuk ka faj pse njerëzit shesin votën apo se Bashkitë humben për shkak të lidhjeve të politikës me krimin.
Në krah të Bashës kanë dalë publikisht dy prej kandidatëve, Xhemal Bushati i Shkodrës dhe Luan Haka i Dibrës, të cilët kanë thënë se në këto zgjedhje votat për PD-në nuk ishin reale.
Bushati tha se këto zgjedhje nuk u humbën nga PD, por u fituan nga treshja Doshi-Berisha-Rama.
“Kam thënë unë? Ka qenë një deklaratë e nxituar. Shkodrën nuk e kemi humbur, Shkodrën e ka fituar Sali Berisha Edi Rama dhe Tom Doshi’, ka thënë Bushati para gazetarëve.
Të njëjtin prendendim ka pasur dhe Luan Haka që kandidoi në Dibër. Ai tha se nuk ishte faji i PD që njerëzit ishin shitur për një thes miell, dhe shtoi se në Dibër ishin angazhuar grupime të larta të qeverisë për të marrë vota me çdo kusht. Në deklaratën e bërë, Haka përmendi gjithashtu se 75% e demokratëve në Dibër e donin Bashën si kryetar.
“Basha ka bërë një fushatë për të fituar. Pse more Basha do e kapi votën në Dibër? Çfarë të bëjmë ne kur njerëzit shiten për një thes miell? Ky nuk është dorëzim, por vazhdimi i një beteje. Në Dibër mbi 75% e demokratëve e duan shumë Bashën. Unë kam dalë me fitim në Dibër”, tha Haka.
Reagimet e dy kandidatëve erdhën pak para nisjes së mbledhjes së Kryetarëve të degëve me Bashën, e cila pason mbledhjen e Grupit Parlamentar, ku Lulzim Bashës iu kërkua dorëheqja nga të paktën 18 deputetë.
