Derbi, Tirana-Partizani ishte supersfida e javës së 24-të të Superligës. Ndeshja u zhvilluar ditën e shtunë në “Air Albania’ dhe u mbyll në barazim 0-0 me të dyja ekipet që morën nga një pikë. I ftuar në emisionin “Rubrika Sportive”, analisti i futbollit shqiptar, Shkëlqim Muça analizoi derbi e kryeqytetit, ndërsa theksoi se kjo ndeshje ishte një ndeshje e varfër dhe me shumë gabime nga të dyja ekipet.
Stenio Junior? “Është një lojtar me karakteristika të lavdërueshme, por luan shumë larg botës merr përsipër gjëra që nuk i takon dhe del nga detyrat e tij. Duhet të jetë efektiv atje kur duhet, siç ishte rasti në derbi. Kur je sulmues krahu duhet të jesh shumë i vëmendshëm kur luhet nga krahu tjetër. Mendimi im është që duhet të bëhet efektiv dhe të mos bëj gjërat të kota. Skuka është një lojtar që u la shumë larg skuadrës dhe u mbulua shumë mirë. Nuk është e lehtë të luash me dy mbrojtës të fortë. Një lojtar si Kallaku dhe një qendërsulmues duhet të jenë të lidhur së bashku dhe afër. Kallaku rrinte më shumë i markuar, asnjëherë nuk ishte i lirë dhe nuk ishte mirë fizikisht”.
Derbi? “Tiranës i bënte mirë që të mos humbiste, ndërsa Partizani luante vetëm për 3 pikë. Nga ana psikologjike të dyja skuadrat janë mirë pasi vijnë nga rezultate të mira.
Derbi ishte në pritshmëritë që ne e prisnim. Kishte shumë njerëz dhe ndoshta te lojtarët kishte tension dhe loja nuk u ngrit në nivelin e duhur pasi kishte shumë gabime. Totra dhe Rrapaj ishin ndër të vetmin që punuan mirë me topin, ndërsa pjesa tjetër gabuan.
Tirana ishte mirë në pjesën e parë, ndërsa në të dytën ishte Partizani me ndryshimet e bëra. Me futjen e Carës, Partizani mori fushë, ndeshja ishte interesante e të dyja skuadrat mund të fitonin. Terreni të lejon të bësh një lojë të rrjedhshme, por nuk kishte shumë gjuajte në portë dhe ishte e varfër me raste”, u shpreh Muça.
