Partizani doli me vetëm një pikë dhe pa asnjë gol të shënuar në derbin e kryeqytetit përballë Tiranës në “Air Albania”. Gjithsesi lojtarët e aktivizuar dhanë performanca të mira, gjë që nuk i lejoi kundërshtarët të shënonin.
Notat dhe vlerësimet për lojtarët e Partizanit janë si më poshtë:
HOXHA 6 – Jo se porta e tij ishte tabelë qitjeje, por sepse në dy raste bllokoi Xhixhën nga gola të sigurt.
A.MARKU 7 – Më i miri te Partizani. Luan si një veteran derbi. Mbron, sulmon, por ka fatin e keq të punojë shumë edhe për Zhuniorin. Gjithsesi, shkëlqen. Gjetje e kuqe.
BELICA 6 – I saktë në ndërhyrje, mundohet të mbulojë De Silvën së bashku me Bitrin dhe ia dalin. Vuajnë ndryshimin e rreshtimit në pjesën e dytë.
BITRI 6 – Në një rast huqi i tij mund të ishte fatal, por punon, lufton dhe bën gjithçka mirë. Ka një mundësi për gol që e shpërdoron.
HADROJI 5.5 – Rrezikon shumë në pjesën e parë si me Seferin dhe Totren. Vuan derbin e parë, por tjetrin do të jetë ndryshe. I pasigurt në ndonjë rast.
SOTA 6 – Merr gjysmënote më shumë se Hadroji për faktin që bllokon Seferin me fizik dhe sulmuesi i Tiranës. Ndërron krahun. Duhet të jetë më i kthjellët në disa raste (luan nga minuta e 46-të).
RRAPAJ 6 – Pritet më shumë nga ai. Në pjesën e parë vuan presionin e kundërshtarëve dhe nuk ka hapësira. Në pjesën e dytë lëviz dhe del te Rrapaj që njohim.
MATONDO 6.5 – Për ndeshjen e parë si titullar te Partizani që bie në një derbi ai është i shkëlqyer. Shpërdoron tre topa, ndërsa penalltia dhe kartoni i shpejtë i ulin notë.
KALLAKU 5 – Loja e tij nuk është ajo që pritet. Është me ritëm të ulët dhe nuk përplaset. Në derbi duhet forcë e mendje e kthjellët. Ndeshje jo e mirë.
CARA 6 – Vetëm Mehmeti e di përse nuk e aktivizon nga minuta e parë. Gjuan portën, por gabon te një rast ku në vend që të kërkonte goditjen e pamundur duhet të pasonte te Skuka (luan nga minuta e 56-të).
MALA 6 – Mund të ishte edhe notë më e ulët. Gjithsesi, ai është nga ata që i zgjidh i vetëm derbet. Vuan lëvizjet e pozicionit që i bën trajneri nga lart-poshtë.
SKUKA 5.5 – Kërkon të çajë, por nuk ia del. Humbet çdo duel me dyshen e qendrës së Tiranës. Mundohet, por vuan fizikun e Najdovskit e Hoxhallarit.
ZHUNIOR 4 – Humbet rast të artë dhe te Partizani duhet ta vënë para përgjegjësisë. Vetëm një i papërgjegjshëm mund të bëjë atë gabim. Me portën bosh, ka kohë të stopojë topin dhe të shënojë. Vetëm ai e di si humbi rastin më të mirë të ndeshjes.
- MARKU – Pa notë sepse luan vetëm tetë minuta. Shumë pak për ta vlerësuar.
