Lulzim Basha foli për herë të parë pas humbjes së zgjedhjeve lokale të 6 Marsit.
I pyetur nga gazetarët nëse do të mbajë përgjegjësi për disfatën e radhës – ku doli forcë e tretë në 5 nga 6 bashki, Basha nuk përmendi në asnjë moment se do të jepte dorëheqjen si kryetar i PD-së.
Basha tha se zgjedhjet kishin probleme dhe në këtë aspekt, sipas tij, nuk u reflektua. Ai e quajti 6 Marsin një “anormalitet”.
Basha tha se vendi ka nevojë për një reformë zgjedhore, ndërsa shtoi se “kjo është arsyeja kryesore pse ndodhemi në parlament”. Basha tha se pjesëmarrja e ulët në zgjedhje tregoi se qytetarët e braktisën procesin. Ai u shpreh se po bën betejë prej tetë vitesh, ndërsa shtoi se është gati të udhëheqë Partinë Demokratike dhe “luftën po e bën për shqiptarët”.
“Dua që procesi të përfundojë dhe iu bëj thirrje numëruesve të vijojnë deri në fund. E kam bërë të qartë që 6 marsi ishte një anomali. Anomalia e parë ishin zgjedhjet moniste të 30 qershorit. Anomalia e dytë ishte që 4 kryebashkiakë dolën me rekorde kriminale. Në këto kushte, dhe kur nuk ka asnjë reflektim për 25 prillin, mendoj se shqiptarët e kanë kuptuar nevojën për një reformë të thellë zgjedhore. Kemi detyruar krijimin e komisionit për reformën zgjedhore që t’i jap qytetarëve një sistem që i përfaqëson. Sot kemi një sistem që është vënë në shërbim të një grushti qytetarët, që i pasuron ata dhe varfëron qytetarët. Nuk ka shqiptar që nuk e kupton se 6 marsi është një anormalitet. Asgjë nuk ka ndryshuar me krimin zgjedhor të 25 prillit”, deklaroi Basha.
Me një mospjesëmarrje tregon se qytetarët e braktisën procesin sepse nuk kishte asnjë garanci. PD-së iu mohuan komisionerët. Aleanca e non gratave kërcënoi komisionerët në Vorë. Ne kemi bërë 3 denoncime në SPAK për mospërmbushje të detyrave. Shqipëria ka arritur në një pikë të papranueshme sa i përket zgjedhjeve, këtë e tregoi dhe elektorati me mospjesëmarrje. Na takon ne të bëjmë një reflektim për reformim të brendshëm që ka nisur, nevojës për t’u ndarë nga e shkuara. Nuk është koha për t’i ikur përgjegjësive, por janë asgjësuar zgjedhjet. PD është në një sulm të shumëfishtë për nevoja personale. Përgjigjja jonë është një reformë më e thellë”, u shpreh ai.
Në fund, ai tha se nuk ka humbur asnjë garë në jetën e tij. “Jam përballur me masakra zgjedhore, por unë nuk kam humbur asnjë garë në jetën time. Lufta ime nuk është për fatin tim personal, por për shqiptarët”, tha Basha.
Lexo edhe:
