Lulzim Basha është përballur me kritika të shumta nga deputetët demokratë, të cilët i kërkuan dorëheqjen pas rezultatit të dobët të shënuar nga Partia Demokratike në zgjedhjet e pjesshme lokale të 6 marsit. Për herë të parë në 31 vite, PD e drejtuar nga Lulzim Basha, u rendit e treta në 5 bashki, me përjashtim të Rrogozhinës, ku doli forcë e dytë.
Por, ndaj kërkesave të deputetëve për të dhënë dorëheqjen nga posti i kryetarit, Basha u përgjigj se kishte dy rrugë, njëra për riorganizimin e PD dhe tjetra për t’i dorëzuar partinë Berishës.
“Dy rrugë ka. Ose rrimë bashkë e bëjmë riorganizim ose ja dorëzojmë Sali Berishës. Synimi Berishës ta marrë PD për tu mbrojtur nga non grata”, tha Basha.
Menjëherë pas kësaj deklarate, deputeti Agron Gjekmarkaj tha se jepte dorëheqjen nga posti i nënkryetarit të PD-së.
