Kandidati i PD-së së Lulzim Bashës për Shkodrën në këto zgjedhje lokale, Xhemal Bushati, hodhi votën në kutinë e votimit këtë të Diel.
Në një prononcim për gazetarët pas votimit, ai shmangu deklaratat për kandidatët e tjerë, ndërsa tha se PD di ti zgjidhë problemet e veta dhe do të fillojë nga nesër. Sot, u shpreh ai, duhet që demokratët të përqendrohen te votimet.
“Sot është dita që tanë shkodranët me përdor fuqinë e votë së tyre për Shkodrën. I ftoj qytetarët e Shkodrës, qytetarët e njësive administrative të shkojnë të votojnë, të votojnë për Shkodrën, të votojnë për të ardhmen e fëmijëve të tyre, të votojnë për të ardhmen e tyre, të shtojnë votën me dashni për Shkodrën”, u shpreh Bushati.
Duke iu përgjigjur interesit të gazetarëve, ai tha se gjithë komisioneret e PD janë në detyrë.
Mendoni se duke pasur një përçarje në PD do ta ruani Shkodrën si bastion dhe a do jeni ju fituesi i kësaj gare?
“Këto janë zgjedhje lokale. PD din ti zgjidhi problemet e veta dhe do ti zgjidhë nesër e mbrapa. Sot shkodranët duhet të jenë bashkë për Shkodrën dhe Partia Demokratike, anëtarët e PD duhet të dijnë të votojnë sot”, u përgjigj Bushati.
Përballja juaj më e fortë është me “Shtëpinë e Lirisë” apo Partinë Socialiste?
“Nuk kam përballje, kam një kontratë me qytetarët e Shkodrës. Do ecim përpara dhe do mbarojmë deri në fund kontratën”, tha ai.
