Ivi Kaso dhe Arben Ristani, mbështetës së koalicionit “Shtëpia e Lirisë”, thanë se procesi i votimit të Vorë vijon normalisht dhe pala e Lulzim Bashës po tenton ta manipulojë.
Në një deklaratë për mediat, Kaso iu përgjigj pretendimeve të palës së Bashës se po shkelet ligji duke mos miratuar komisionerët e tij në Vorë.
“Procesi ka nisur dhe vijon normalisht jo vetëm sipas frymës por edhe sipas germës. Ka një tentativë manipulimi nga fraksioni i vulës”, tha Kaso, sipas të cilit, Basha “e ka katandisur (partinë) që të mos gjejë komisionerë”.
“Për fat të keq ngre dhe alarme të kota dhe vijon me pretendime se procesi po manipulohet, janë marifete të turpshme me qëllim për të ndotur procesin, se dihen se janë humbës me distancë të madhe nga i përzgjedhuri i Vorës që të drejtojë nesër Vorën”, tha Kaso.
Ai shpjegoi se komisionerët duhet të jenë banorë të Vorës. Sipas tij, ngaqë s’gjeti dot komisionerë në Vorë, Basha donte që aty të ishin persona nga Tirana apo gjetkë.
“Në një tentativë për të manipuluar procesin donin ti fusin nga dritarja meqë su pranuan nga dera”, tha ai.
Edhe Arben Ristani mbajti të njëjtin qëndrim. “Të mos vendosësh komisionerë tregon mungesë njerëzish. Ata duhet të mësojnë se zgjedhjet nuk fitohen në tavolinë, por në terren. Qoftet nuk mund ti hanë të gatshme. Tregon se s’kanë përtharje. S’kanë njerëz që ti shkojnë nga pas”, tha Ristani.
Më herët, edhe kreu i KQZ-së, Ilirjan Celibashi rrëzoi pretendimet e palës së Lulzim Bashës.
