Të tjera detaje janë zbardhur nga atentati i mbrëmjes së djeshme në Vlorë, ku mbeti i plagosur Romeo Meçaj.
Nga raportimet mësohet se policia ka shoqëruar 7 persona, të cilët mohojnë se Meçaj ka pasur konflikte. I riu Romeo Meçaj vijon të jetë në gjendje kritike për jetën ndërsa grupi hetimor ka sekuestruar kamerat e sigurisë në zonë për zbardhjen e ngjarjes .
Personat e shoqëruar kanë qenë prezent në lokalin ku është qëlluar i riu.
Edhe pse drejt Romeo Meçajt u qëlluan 15 plumba, ai i ka shpëtuar vdekjes, ndërsa grupi hetimor dyshon se në këtë atentat kanë marrë pjesë më shumë se dy persona.
Autorët të cilët dyshohet se janë porositur për të kryer atentatin, kanë ruajtur Meçajn, dhe duket e kanë pritur pranë Pallatit të Sportit.
Makina e autorëve Volkswagen u gjet e djegur pas tentativës së vrasjes, ndërsa pas verifikimeve të kryera rezulton se është e vjedhur.
Brenda makinës janë gjetur edhe 2 armë të tipit kallashnikov ndërsa grupi hetimor bën me dije se janë sekuestruar kamerat e sigurisë për të zbardhur dinamikën e ngjarjes.
33-vjecari Meçaj ka qenë duke udhëtuar pranë zonës së Skelës me mjetin e tij ‘Land Rover’ kur është përballur me breshëri plumbash dhe pasi është qëlluar ai ka ecur për disa metra i plagosur duke u përplasur me mjete të tjera të parkuara në atë zonë.
Sipas bluzave të bardha nga Spitali i Traumës në Tiranë gjendja e të riut Romeo Meçaj është e rënduar dhe në rrezik për jetën.
