Presidenti rus Vladimir Putin dhe presidenti francez Emmanuel Macron folën sërish me telefon të Dielën, në një bisedë që zgjati një orë e 45 minuta, thotë presidenca franceze.
Ende nuk janë dhënë detaje se çfarë është diskutuar. Të dy liderët kishin folur me telefon të Enjten, në bisedime që lanë përshtypjen e Macronit se qëllimi i Putinit ishte të merrte të gjithë Ukrainën, sipas një zyrtari francez.
Macron është një nga disa liderët botërorë që kanë biseduar me Putinin ditët e fundit duke shpresuar të ndërmjetësojnë një armëpushim në Ukrainë.
Më herët të Dielën, Putin foli me presidentin turk Rexhep Tajip Erdogan, i cili bëri thirrje për një ndërprerje urgjente të armiqësive.
Sipas një leximi të telefonatës nga Kremlini, Putin i tha Erdoganit se negociatorët e Ukrainës duhet të kenë një “qasje më konstruktive” në bisedime, “duke marrë plotësisht parasysh realitetet në zhvillim”.
“U nënvizua se pezullimi i operacionit special është i mundur vetëm nëse Kievi ndalon operacionet ushtarake dhe përmbush kërkesat e njohura ruse”, tha Kremlini. Rusia e ka quajtur pushtimin e saj një “operacion special”.
