Rruga ku ndodhen selitë e ambasadave në Tiranë, pranë ambasadës së Ukrainës, ambasadës Ruse dhe asaj Serbe, do të emërtohet “Free Ukrainë” (Ukraina e Lirë).
Kjo është bërë e ditur nga Kryebashkiaku i Tiranës, Erion Veliaj teksa shkruan në Twitter:
“Tirana do të emërtojë një segment rruge në rreshtin e ambasadës “Ukraina e lirë”. Ambasadat e Ukrainës, Rusisë, Serbisë dhe Kosovës janë në atë rresht. Lufta e Serbisë në Kosovë dhe lufta ruse në Ukrainë kanë përcaktuar brezin tonë”.
Duket se emërtimi i rrugës “Ukraina e Lirë” është një “provokim” që bëhet nga ana e Veliajt për ambasadën ruse dhe atë serbe, vende që janë në aleancë të vazhdueshme.
Rusia prej 10 ditësh ka nisur një luftë të përgjakshme në Ukrainë, duke sulmuar me raketa dhe bombardues ajërorë, ndërsa u ka marrë jetën edhe qindra civilëve, mes tyre gra, fëmijë dhe të moshuar.
