Shefi i politikës së Jashtme të BE-së, Josep Borrell është shprehur në favor të ndërmjetësimit të Kinës në luftën e Rusisë kundër Ukrainës.
“Nuk ka alternativë. Ne evropianët nuk mund të jemi ndërmjetës, kjo është e qartë… Dhe as SHBA-ja. Unë besoj se ndërmjetësi duhet të jetë Kina”, tha Borrell në një intervistë për gazetën spanjolle “El Mundo”.
Por Borrell, i cili është nga Spanja, pranoi se nuk kishte plane të forta nga palët ndërluftuese dhe mbështetësit e tyre për një ndërmjetësim të jashtëm nga Kina.
“Ne nuk e kemi kërkuar këtë dhe as kinezët nuk e kanë kërkuar”, tha Borrell.
Borrell mbështeti dërgimin e armëve evropiane në zonën e luftës dhe vendosjen e sanksioneve të ashpra ndaj Rusisë.
“Këto masa ishin absolutisht të nevojshme, pavarësisht nga përpjekjet diplomatike për zgjidhjen e konfliktit”, shtoi ai.
“Dërgesat e armëve u mundësojnë ukrainasve të mbrohen, të jenë në pozitë më të mirë për të negociuar dhe, nëse është e mundur, për të arritur një armëpushim”, tha ish-ministri i Jashtëm spanjoll dhe ish-presidenti i Parlamentit Evropian, Borrell.
“Dhe më pas, diplomacia duhet të luajë rolin e saj, dhe këtu Kina “duhet të luajë një rol,” theksoi ai.
