Këshilli i Kombeve të Bashkuara për të Drejtat e Njeriut ka votuar për krijimin e një komisioni të pavarur hetimor si rezultat i pushtimit rus të Ukrainës.
“Këshilli i të Drejtave të Njeriut ka vendosur të krijojë urgjentisht një komision të pavarur ndërkombëtar hetimor si rezultat i agresionit të #Rusisë kundër #Ukrainës”, tha këshilli në një postim në Twitter të premten.
“Anëtarët e OKB-së nga të gjitha rajonet anembanë botës u bashkuan në këshill për të dënuar agresionin e Rusisë kundër Ukrainës në termat më të ashpër të mundshëm,” tha Përfaqësuesja e Përhershme e Ukrainës në OKB, Yevheniia Filipenko, pas votimit.
“Mesazhi për Putinin ka qenë i qartë. Ju jeni të izoluar në nivel global dhe e gjithë bota është kundër jush.”
Dy vende, Rusia dhe Eritrea, votuan kundër vendimit dhe 13 shtete anëtare abstenuan, duke përfshirë Kinën, Kubën, Armeninë, Kazakistanin, Indinë, Uzbekistanin dhe Venezuelën.
Ishin 32 vende që votuan pro vendimit.
