Çmimi i naftës në Shqipëri është rritur në kuota rekord, ndërsa në pikat e tregtimit me pakicë sot çmimi luatej mes 210-220 lekë për litër.
Kjo shifër konsiderohet rekord që prej vitit 2009.
I ftuar në “Radarin Informativ”, ish-ministri Edmond Panariti ka thënë se në Shqipëri çmimi i naftës nuk ndiqet sipas parametrave të bursës. Ai shpjegon se sot në bursë pati një ulje të çmimit por në Shqipëri nafta sa vjen e rritet ndikuar edhe nga taksat.
“Shtrenjtimi naftës? Sot ra nafta në bursa. Se pati një situatë shprese. Sot kërceu këtu nafta. Çmimi këtu nuk ndjek parametrat e bursës. Ka spekulime. Ne naftën e ngarkojmë me taksa të jashtëzakonshme. 120 lek shkojnë taksa. I merr shteti dhe rriten çmimet rrjedhimisht. Janë efekt zinxhirë. Ke fabrika përpunimi me naftë. Ke energji me naftë. Pra shkon zinxhirë”, tha Panariti.
Sipas tij, shteti është rregullator, në situata emergjente kur gjykon të ngrijë çmime, mund të ndërhyjë. “Të vendosen tavane deri sa të kalojë emergjenca”, tha Panariti.
