Komisioni i Pavarur i Kualifikimit shkarkoi sot nga detyra prokuroren në Prokurorinë pranë Gjykatës së Rrethit Gjyqësor Fier, Violeta Shkurta.
Violeta Shkurta, prokurore në Prokurorinë pranë Gjykatës së Rrethit Gjyqësor Fier u përball me Vetingun me 25 shkurt për tre kriteret e vlerësimit, ligjshmërinë e pasurisë dhe kriterin etik dhe profesional.
Gjatë seancës dëgjimore, KPK konstatoi pamundësi financiare në vlera të mëdha për krijimin e pasurive nga prokurorja e Fierit, Violeta Shkurta, si dhe e vlerësoi të padrejtë përfitimin e një kredie të butë, ndërkohë që zotëronte dy apartamente. Ajo tha se pasurinë e kishte krijuar me burime të ligjshme.
Prokurorja Shkurta mori vlerësim pozitiv për pastërtinë e figurës.
Trupa gjykuese e përbërë nga Firdes Shuli, Xhensila Pine, Olsi Komici pasi analizoi provat dhe faktet vendosi sot shkarkimin nga detyra të prokurores Violeta Shkurta.
Violeta Shkurta e ka nisur karrierën si oficere e policisë gjyqësore në vitin 1989 dhe punon prej gati dy dekadash si prokurore në Prokurorinë e Fierit. Prej vitit 2019, Shkurta është promovuar si drejtuese e përkohshme e Prokurorisë së Fierit.
