Kryetari i bashkisë së Kievit tha për “Associated Press” se qyteti tani është “i rrethuar” nga forcat ruse.
Vitali Klitschko u pyet nëse kishte plane për evakuimin e civilëve nëse trupat ruse kapnin kryeqytetin.
“Ne nuk mund ta bëjmë këtë, sepse të gjitha rrugët janë të bllokuara,” tha ai, “për momentin ne jemi të rrethuar.”
“Sapo po flisja me presidentin. Të gjithë po ndihen keq”, tha Kliczko. Ai shtoi se stafi i administratës ishte i tronditur, por jo i dëshpëruar. “Ne tregojmë karakterin, njohuritë, aftësitë tona”, u shpreh ai.
“Për të qenë i sinqertë, ne nuk kemi kontroll 100%,” tha Klitschko. “Ne e ndërtuam këtë mbrojtje territoriale në një kohë të shkurtër – por këta janë njerëz patriotë”, u shpreh.
“Tani për tani, çështja më e rëndësishme është mbrojtja e vendit tonë”, shtoi ai.
I pyetur për kapacitetin e qytetit për të rimbushur rezervat e pakësuara të ushqimit dhe ilaçeve, Klitscho tha: “Ne jemi në kufirin e një katastrofe humanitare. Tani për tani kemi rrymë, tani kemi ujë dhe ngrohje në shtëpitë tona. Por infrastruktura është e shkatërruar për të ofruar ushqim dhe mjekim.”
Kryetari i bashkisë konfirmoi se nëntë civilë në Kiev ishin vrarë deri më tani, duke përfshirë një fëmijë.
Vitali Klitschko bëri apel për të mbështetur Ukrainën.
“Mbështetni Ukrainën, së bashku ne jemi të fortë,” tha ai. “Çdo ukrainas është krenar që është i pavarur, krenar që është ukrainas dhe ne jemi krenarë që kemi vendin tonë”.
Lexo edhe:
Çfarë po ndodh në Ukrainë/ Përditësimi i fundit mbi zhvillimet e ditës
