Ish-Kryeministri Sali Berisha vijon sot fushatën në kuadrin e zgjedhjeve të pjesshme lokale të 6 marsit në Bashkinë e Shkodrës.
Sot Berisha do të zhvillojë 3 takime elektorale, në zonat periferike të Bashkisë së Shkodrës në mbështetje të kandidatit Bardh Spahia, i cili garon në siglën e koalicionit “Shtëpia e Lirisë”.
Takimin e parë Berisha e mban me banorë dhe struktura në Dajç në orën 11:30, për të vijuar më pas në Bërdicë në orën 15:00. Në orën 17:00, Berisha do të jetë në Velipojë, ku gjithashtu pritet të mbajë një takim me banorët dhe strukturat.
Edhe dje, fushatën elektorale për zgjedhjet që do të mbahen të dielën e ardhshme, ish-Kryeministri e zhvilloi në Shkodër, ku pati takime me Forumin e Gruas Demokrate dhe atë Rinor.
Berisha i ka bërë thirrje shkodranëve të mbështesin kandidatin Spahia, përfaqësuesin e opozitës së vërtetë, ndërsa u shpreh se kandidati i Lulzim Bashës, do të renditet i 3-ti.
Ish-Kryeministri deklaroi se 6 marsi duhet të kthehet në një ditë shprese për shqiptarët, ndërsa tha se kjo do të jetë fitorja e parë e revolucionit paqësor.
Nga sondazhet e publikuara, rezulton se kandidati i koalicionit “Shtëpia e Lirisë” udhëheq bindshëm në raport me dy kandidatët e tjerë që garojnë në siglat e PS dhe PD.
