Mjekët e infektivit thonë se ka pasur raste që riinfektimi me Omicron ka çuar pacientin në spital. Doktoreshë Elda Qyra shpjegon arsyet përse përkeqësohet gjendja shëndetësore e pacientëve, raporton ABC.
Infeksionistja Elda Qyra, tregon se si paraqitet situata në spitalin infektiv, pas valës së tretë të përhapjes së Covid.
Sipas saj, ka pasur raste që pacientët, jo për shkaqe pulmonare, kanë kërkuar ndihmën spitalore për shkak të përkeqësimit të situatës së përgjithshme.
“Fakti që kërkojnë ndihmë spitalore tregojnë se pacientët janë në gjendje mesatare deri të rëndë. Omicron ka një klinikë më të rëndë se gripi, por më të lehtë se Delta”, tha Qyra, sipas të cilës aktualisht shtrimet në spitale variojnë nga 7 në 8 raste në 24 orë.
Duke përfituar nga rënia drastike e shtrimeve spitalore, Spitali infektiv po bëhet gati të zhvendoset tek Covid 3, ish kirurgjia, për t’iu nënshtruar rikonstruksionit. Kjo ishte planifikuar në muajin janar por numri i lartë i shtrimeve në spital e bëri të pamundur zhvendosjen në kohë.
