Rusia zgjeroi sulmin ndaj Ukrainës në periferi të kryeqytetit Kiev më 25 shkurt, pasi sulmoi vendin nga toka, deti dhe ajri një ditë më parë.
Ushtria ruse kreu sulme ajrore në qytete dhe baza ushtarake dhe dërgoi trupa dhe tanke, që vranë 137 civilë dhe personel ushtarak, sipas shifrave të publikuara nga presidenti ukrainas, Volodymyr Zelenskiy.
Ai i quajti ata “heronj” në një video të publikuar në orët e para të 25 shkurtit, në të cilën ai gjithashtu thotë se më shumë se 300 njerëz u plagosën në më pak se 24 orë luftime.
Zelenskiy tha se Rusia rifilloi sulmet me raketa në orën 4 të mëngjesit të 25 shkurtit, por trupat e saj ishin ndaluar të përparonin në shumicën e drejtimeve.
Shpërthimet u dëgjuan nga Kievi herët më 25 shkurt ndërsa sirenat ajrore ranë.
“Ata po vrasin njerëz dhe po i kthejnë qytetet paqësore në objektiva ushtarake. Është e keqe dhe nuk do të falet kurrë,” tha Zelenskiy.
Zelenskiy tha se pavarësisht humbjeve, forcat e armatosura të Ukrainës po “mbronin shkëlqyeshëm vendin kundër një prej kombeve më të fuqishme në botë”.
Akuza lëshoi ndaj shteteve të botës.
Ukraina ndërkohë pret që Rusia të sulmojë Kievin me forca të blinduara, duke thënë se e premtja do të ishte dita më e vështirë e luftës, deklaroi një këshilltar i ministrit të brendshëm. Anton Herastshenko vuri në dukje se ushtria ukrainase në Kiev është gati, e pajisur me raketa antitank, të cilat i janë ofruar vendit nga aleatët e saj të huaj.
Nga ana e saj, zëvendësministrja e Mbrojtjes Hanna Malyar vlerësoi se forcat ruse mund të mbërrijnë më vonë në zonat jashtë Kievit, pasi kryeqyteti ukrainas dhe zona të tjera u bombarduan më herët sot. Ajo shtoi se forcat e ushtrisë ukrainase që mbrojnë Kievin në katër fronte po përballen me një forcë numerikisht superiore.
Rusia filloi pushtimin e Ukrainës para agimit të 24 shkurtit, duke lëshuar sulme ajrore mbi qytete dhe baza ushtarake dhe duke dërguar trupa dhe tanke nga shumë drejtime. Putin u justifikua duke thënë se “operacioni special ushtarak” erdhi pas ndihmës së kërkuar nga separatistët pro rusë në rajonet e Dombasit dhe synon “demilitarizimin” dhe “denazifikimin” e Ukrainës.
Nga ana tjetër, Ukraina dhe pjesa më e madhe e shteteve e kanë cilësur pushtim.
