Nga Haris Vogli
Pushtimi i Ukrainës nga Cari i Rusisë, Putin – krimineli Putin – tregon jo vetëm egoizmin e tij të sëmurë për pushtet, si dhe egërsirën “njerëzore” brenda qenies së tij, por tregon po ashtu prapaskenat, interesat dhe dështimin e tërë komunitetit ndërkombëtar, politikave të jashtme të çdo vendi, dështimin e tërë politikanëve, diplomatëve, vendimmarrësve, njerëzimit po ashtu.
Nëse Rusia arriti të niste këtë luftë, me justifikimet më ta paskrupullta e të palogjikshme që kam dëgjuar ndonjëherë nga një lider i përmasave të tilla, ngre precedent për Kinën, Korenë e Veriut, Izraelin, Serbinë, etj. Ku do të shkojë bota nga mëngjesi i sotshëm?
E kuptoj zhvillimin e politikës përmes shekujve, pushtimet, luftërat e përgjakjet; çdo lider ka treguar se mund të jetë Princi i Makiavelit dhe se në fakt të gjithë mund të mbijetojmë në Fermën e Kafshëve të Xhorxh Oruellit, por këtë që po ndodh në Ukrainë në 2021-shin as e kuptoj dhe aq më tepër nuk e justifikoj.
E kuptoj epokën e Vikingëve (793-1066 AD), që vranë e prenë në Europë e arritën gjer në Amerikën Veriore. I kuptoj, para 900-ës, Persianët, Luftën e Peloponezit, etj. E njoh pushtimin nga mongolët (1200-1299), Timuridët (1300-1499), Otomanët dhe pushtimet e 1600-ës e 1700-ës, Revolucionin Francez (1792-1815). Di mjaftueshëm mbi Luftën e Parë Botërore (1914-1918), Luftën e Dytë Botërore (1939-1945), e shumë pushtime të tjera në historinë njerëzore.
Jam koshiente për shumë etje vampirësh për gjak njeriu, për shtrirje territoriale më të gjëra, e triumfe pushteti me pasoja katastrofike për njerëzimin.
I kuptoj të gjitha këto, por sot Elon Musk na flet për vizitat turistike në planetet e tjera, Biden e Boris Johnson flasin për kalimin me sukses të Pandemisë Covid-19, dhe Harry u martua me Megan Markel, etj.
Ndërkaq, si mundet të jetë kaq e bëshme që Rusia të flasë për gjenocid ndaj ukrainasve nga pushteti i Kievit, ndërkohë që po bombardon e vret njerëz të pafajshëm?! Vallë Amerika do e shpallë Putinin ‘persona non grata’, apo ka shpallur Abramavoiçin?
Jemi në vitin 2022, ku është dalë në konkluzionin se armët e mijëvjeçarit të ri janë gigat dhe bitet (bits and bytes) – jo plumbat (bullets) (Ayad, N. 2010). Mesa duket, ka kafshë politike që jetojnë ende me fantazmat e së kaluarës duke e menduar veten mbinjerëzorë e të pavdekshëm.
Ka diktatorë që vetë populli i tyre i mban në pushtet, sikurse shqiptarët Edi Ramën. Pra, ka pafundësisht dele e pak ujqër. Ku janë fuqitë botërore, marrëveshjet dhe strategjitë afatgjata, Europa dhe USA? Pushtimi i Ukrainës nga Rusia është dështimi i gjithkujt!
