Ish-Kryeministri Sali Berisha ka vijuar fushatën për zgjedhjet vendore të 6 marsit në Bashkinë e Durrësit, ku zhvilloi një takim me fermerët e zonës së Shkallnurit.
Berisha tha se në qeverisjen e PD u investuan mbi 3.2 miliardë euro për fshatin. Por ai tha se prej tetë vitesh, bujqësia u la pas dore.
“Potenciali për bujqësinë është shumë i madh, por ne kemi humbur tetë vite. Bujqësia në tërësi u braktis,” tha Berisha.
Më tej Berisha tha se nisma e Ballkanit të Hapur po rrënon fermerët shqiptarë. Sipas tij, çmimet në vend janë rritur sepse jemi në situatë monopoli.
Në fjalën e tij, Berisha tha se zgjedhjet e 6 marsit duhet të japin një mesazh shprese. Ai bëri thirrje që të votohet për Ardian Mukën.
“Nëse ka diçka të braktisur në këtë vend në tetë vite, ajo është bujqësia. Ju garantoj se bujqësia ka qenë dhe mbetet një përparësi madhore për PD-në.
Ardi Muka do ketë një vëmendje dhe do shfrytëzojë të gjithë potencialet e bashkisë me të gjithë mundësitë që i krijohen për t’ju mbështetur ju.
Zgjedhja e tij më 6 mars do të jetë mesazhi i shpresës së madhe dhe i kthesës së madhe që ne synojmë të ecim të sigurt drejt një fitore të ardhshme të Partisë Demokratike,” tha Berisha.
Ish-Kryeministri tha se Qeveria e sotme nuk subvencionon fermerët, ajo fshiu skemat e mbështetjes për fermerët me grande të vogla, pasi grandet e vogla 2 apo 3 mijë euro, ju ndihmojnë juve, por nuk mund të vidhen, sepse nuk mbetet gjë për tu ndarë. Berisha tha se qeveria po vjedh dhe shpërdoron taksat e shqiptarëve.
“Ju keni dëgjuar mbi djegësat, me të cilët janë vjedhur 410 mln lekë, djegësat nuk janë në punë, dhe në Ballkan ka vetëm një djegës plehrash dhe nuk ekzistojnë askërkund tjetër. Ne kemi 3 djegësa, sepse këta kanë skemën që të vjedhim sa më shumë. Imagjinoni sikur këto 410 mln euro të investoheshin në bujqësi? Gjithçka bazohet në skemën e vjedhjeve dhe abuzimeve”, tha Berisha.
