Kryeministri Edi Rama, teksa po përgjigjet para Komisionit hetimor parlamentar lidhur me aferën e inceneratorëve, për të cilën tha se ai mburret lidhur me ato që janë realizuar pasi sot nuk gjen plehra rrugëve, njoftoi deputetët në një moment lidhur me vendimin e Gjykatës për dënimin me 17 vite burg të Francesco Becchetit.
“Një lajm i fundit, Becchetti u dënua me 17 vite burg, uroj mos jetë “fake news””, tha Rama duke mos fshehur gëzimin për vendimin.
Ndërsa Kryetarja e Komisionit, Jorida Tabaku, tha “z. Rama keni një tjetër Komision hetimor lidhur me çëstjen Becchetti, këtu jemi për inceneratorët”.
Gjykata e Tiranës ka dënuar me 17 vite burg Francesco Becchetti-n, për pastrim parash dhe vjedhje duke shpërdoruar detyrën.
Prokuroria kishte kërkuar 20 vite burg për biznesmenin italian.
Sipas Gjykatës, Becchetti ka krijuar një sistem shoqërish tregtare, me qëllim fshehjen e veprimtarisë kriminale.
Sipas Gjykatës, asetet e tyre dhe llogaritë bankare të shoqërive do kalojnë në favor të shtetit.
