Prej gati dy orësh, Kryeministri Edi Rama po dëshmon para Komisionit Hetimor Parlamentar për inceneratorët, ndërsa seanca po shoqërohet herë me tensione dhe batuta mes tij dhe drejtueses së komisionit, Jorida Tabaku. Kjo e fundit disa herë ka kërkuar ruajtjen e qetësisë, ndërsa Rama në një moment iu drejtua “më je bërë si Ilir Meta, me qetësi me qetësi, jo po thuaj edhe me dashuri”.
Kryeministri Edi Rama këmbënguli se nuk do fliste pa i kërkuar falje kryetarja e Komisionit, e cila sipas tij, i keqinterpreton deklaratat.
“Ose do të më respektoni si dëshmitar dhe nuk do t’i komentoni më fare ato që them unë, ose pastaj do të rrimë këtu deri më 6 mars. Dua një ndjesë të vogël. Në të kundërt do të mbeteni pa fushatë, pasi deri me 6 mars do të jemi këtu”, tha Rama.
Rama u shfaq dukshëm i tensionuar, ndërkohë që kërkoi ndërprerjen e seancës, duke thënë se po e acaronte kryetarja Jorida Tabaku.
“E ke zërin shumë grricës,” i tha Rama, duke shtuar “mos më interfero, ndryshe unë bërtas, kur ju nuk flisni, unë flas qetësisht”.
I pyetur prej Tabakut nëse kishte nevojë për ndihmën e Ermonela Felajt, pasi kjo e fundit ndërhynte shumë shpesh në pyetje- përgjigjet e kryeministrit Rama, ai i tha: “me ju përballë të kem nevojë për Ermonelën? A ka logjikë kjo?”
Pas ndërhyrjes së deputetit Lefter Gështenja, Rama tha: “Do më lësh të thyej këto arrat e mia o zoti Gështenja”.
Tabaku: Me qetësi, këtë batutë e kanë thënë të tjerë para jush.
Rama: M’u bëre si Ilir Meta tani me këtë fjalën “me qetësi”, çfarë është kjo tani? Me qetësi, me dashuri, ca qetësie tani?
Rama: Po fyeve, nuk e di ç’të pret pastaj.
Tabaku: Ule zërin në këtë komision, a mund të kesh respekt se po flasim për paratë publike.
Rama: Merrni masat, qetësohuni. Sekretarin e partisë e kam pasur përballë kur kam qenë i vogël. Unë këtu sot kam ardhur për lekët e shqiptarëve dhe nuk iki pa i sqaruar.
