Dy ndeshjet e mbrëmjes në Champions League dhuruan jo pak emocione. Juventusi e nisi vrullshëm në mënyrë të jashtëzakonshme ndeshjen në transfertë ndaj Villarreal teksa Dusan Vlahoviç shënoi vetëm 33 sekonda pas startit dhe në prekjen e parë të tij.
Ishte një mbrëmje që do të mbahet mend për sulmuesin serb por më pas më shumë ndeshja foli për Villarreal. Që në pjesën e parë vendasit ishin afër golit të barazimit teksa vetëm në pjesën e dytë pas një presioni të madh, Dani Parejo vendosi barazpeshën në 66’.
Pak minuta para fundit ishte sërish Vlahoviç që me një rast nga jashtë zone mund të mbyllte sfidën me një fitore por nuk ia doli e gjithsesi bardhezinjtë largohen me një rezultat të mirë.
Në takimin tjetër, ra në sy mungesa e Lukakut. Pa bomberin belg, Chelsea arriti të fitonte 2-0 ndaj Lille një ndeshje aspak të lehtë por falë konkretizimit vendasit mbyllën pothuajse çështjen e kualifimimit për në 1/8.
Në minutën e 8’, Kai Havertz, në rolin e një sulmuesi sonte kaloi përpara skuadrën e Tuchel teksa Lille ishte agresive në fushë gjatë gjithë kohës. Në pjesën e dytë, pas një aksioni model nga vendasit, Christian Pulisiç shënoi golin e tij të parë në Champions dhe të dytin për Chelsean për të vulosur suksesin 2-0 në këtë takim.
