Lotar Mateus ka folur në komentin e tij të përjavshëm për ecurinë e Bajernit, Dortmundit dhe gjithashtu për debatin e tij me drejtorin sportiv, Hasan Salihamixhiç, të cilin e kritikoi sërish.
“Një Dortmund i inatosur? Përse? Kjo pasi lojtarët dhe drejtuesit e dinë se çfarë skuadrash kanë. 9 gola të pësuar në dy ndeshje dhe më pas një 6-0 ndaj Gladbahut. Stofi për të dalë kampion nuk i mungon verdhezinjve dhe për këtë të gjithë janë në një mendje. Por fati ka luajtur një rol të rëndësishëm në skuadër, dëmtimet dhe pezullimet kanë shoqëruar skuadrën në pjesën më të madhe të sezonit. Borusia ka rrëshqitur më shumë se Bajerni në këtë kampionat. Nëse ato nuk do të kishin ndodhur, atëherë do të kishim një skuadër tjetër në krye të tabelës. Për këtë fajin e kanë vetëm ata, lojtarët dhe drejtuesit. Gjithsesi, nuk është vonë për të shpresuar deri në fund”.
BAJERNI NUK VUAN VETËM PREJ TRAJNERIT “Bavarezët kanë arritur të korrigjojnë disi dy rezultatet e fundit në kampionat dhe Europë. Por edhe ndaj Fyrthit skuadra e Nagelsmanit vuajti shumë edhe pse luante ndaj skuadrës që renditet e fundit në tabelë. Miqtë dhuruan praktikisht dy gola vetë duke ia bërë të lehtë kampionëve për të mos lënë sërish pikë. Do të ishte fatale! Por ky është realiteti. Bajerni ka humbur shkëlqimin. Të gjithë fajësojnë trajnerin që për mendimin tim ka fajet e tij. Por në futboll nuk është ai gjithmonë fajtori. Skemat janë të interpretueshme, rëndësi ka të interpretohen mirë në fushë nga lojtarët dhe në studio nga specialistët. Megjithatë, bavarezët duhet të jenë të lumtur për tri pikët, por paraqitjet e fundit nuk të japin garanci në Champions. Kampionët duhet të rriten në lojën e tyre përndryshe do të vuajnë dhe në ndeshjen e kthimit ndaj Salcburgut”.
DEBATI ME BRAZON “Lojtarët, dhe jo vetëm ata të Bajernit, duhet të jenë në gjendje për t’u përballur me kritikat. Hasani gjithashtu. Mbrojtja që ai u bën atyre është puna e tij ashtu siç është dhe merkatoja. Nëse do të ishte ulur më herët me Niklas Zyle atëherë ai nuk do të ishte larguar kurrë, aq më tepër te rivalët e Dortmundit. Kur mbrojtësi u sulmua nga media, Salihamixhiç nuk e mbrojti, Zyle kurrë nuk u ndie i vlerësuar nga klubi dhe nuk u mbrojt kurrë siç po bëhet me Upameçanon tani. Kjo sepse Zylen nuk e solli te Bajerni Salihamixhiç, kurse Upameçanon dhe Hernadezin po. I uroj më të mirat Bajernit, por nuk mund të vlerësosh gjithmonë skuadrën kur nuk ka asgjë për t’u vlerësuar. Këtë duhet ta kuptojnë të gjithë, ndryshe do të gënjenim veten tonë”.
