Valbona Ballgjini, ish-anëtarja e Komisionit të Prokurimit të Inceneratorit të Tiranës nuk pranoi të dëshmojë në komisionin hetimor për inceneratorët.
Ballgjini ishte e thirrur për të dëshmuar ditën e sotme. Ajo deklaroi se në komision u paraqit “për respekt”, por nuk do të japë asnjë dëshmi pasi ka marrë porosi nga Prokuroria e Posaçme, ku ka dëshmuar për çështjen.
“Unë s’mund të japë asnjë detaj për këtë procedurë meqë jam thirru në SPAK dhe më është thënë se është pjesë e sekretit hetimor”, sqaroi Ballgjini.
Kryetarja e komisionit Jorida Tabaku i tha se refuzimi për të dhënë dëshmi në komision mund të përbëjë vepër penale.
Nga ana tjetër, anëtarja e mazhorancës në komision Ermonela Felaj akuzoi se Tabaku po përpiqet të shkelë sekretin hetimor.
Edhe në seancën e fundit të komisionit javën e kaluar, ashtu si Ballgjini, Florian Muçaj – i thirrur si anëtar i Komisionit të Prokurimit në Inceneratorin e Fierit, tha se nuk ka ndërmend të japë shpjegime në Komisionin Hetimor, pasi ka dhënë dëshmi në SPAK.
