Sërish lëndë narkotike në burgje. Drejtoria e Përgjithshme e Burgjeve ka organizuar në orët e mbrëmjes së të premtes në burgun e Fierit pas informacioneve se brenda institucionit kishte depërtuar drogë.
“Drejtoria e Përgjithshme e Burgjeve organizoi dje rreth orës 22.50 një operacion në IEVP Fier pas informacioneve të marra në rrugë operative se brenda institucionit mund të kishte depërtuar lëndë narkotike. Aksioni është drejtuar nga Drejtori i Policisë së Burgjeve në krye të dy grupeve të forcave operacionale”, informuan burime zyrtare nga drejtoria e burgjeve.
Pas kontrollit të disa dhomave banimi dhe ambienteve të përbashkëta u gjetën nëntë doza të dyshuara si lëndë narkotike. 13 doza të tjera u gjetën fshehur në neonin e tavanit në palestër.
Gjatë kontrollit, u gjet edhe një sharrë e improvizuar me kokën e një makine qethëse si dhe një televizor “Obot” me fijet jashtë për lidhje me kufje, dyshuar si mjet komunikimi.
Materialet i kaluan për veprime të mëtejshme SHKKB, sqarohet më tej në njoftim.
Kujtojmë se në burgun e Fierit u tranferua më herët edhe ish-ministri i Brendshëm Saimir Tahiri, i dënuar me 3 vite e 4 muaj heqje lirie për shpërdorim detyre nga Apeli i Gjykatës së Posacme.
