Kandidati për Bashkinë e Lushnjës Indrit Sefa, ka ftuar për debat publik dy kandidatët e tjerë për këtë bashki, Eriselda Sefën nga PS dhe Elton Banon nga “Shtëpia e Lirisë”.
Në një deklaratë për mediat, Sefa nënvizoi se nëpërmjet debatit kandidatët do mund t’i tregojnë votuesve se kush ka planin më të mirë.
“Në funksion të një fushate qytetare dhe për të treguar se për ne të rëndësishëm janë lushnjarët dhe jo pushteti, ftoj rivalen time, kandidaten e Partisë Socialiste që të zhvillojmë një debat publik për planin e secilit prej nesh për Lushnjën. Në këtë debat është i mirëpritur të marrë pjesë edhe kandidati tjetër. Megjithëse përfaqëson 2 parti të vogla, kushdo duhet të ketë garancitë për një garë të barabartë. Propozoj që ky debat të zhvillohet në një ambient publik, me pjesëmarrjen e qytetarëve, të cilët duhet të kenë të drejtën e pyetjeve dhe bashkëbisedimit me kandidatët. Nëse rivalja ime bie dakord për këtë debat, ne ngarkojmë stafet tona për ta përgatitur atë në kohën më të shpejtë të mundshme. Unë jam i gatshëm, duke filluar nga tani”, tha Sefa.
“E rëndësishme është që në ketë garë ne të vendosim lushnjarët të parët. Të vendosim interesin e qytetarëve të parin. Ata duhet të zgjedhin të lirë, ato duhet të zgjedhin këdo që u jep besim për të qeverisur për ta dhe për t’u shërbyer atyre. Përmes këtij debati, ne kemi shansin të tregojmë përpara zgjedhjeve kush ka planin më të mirë, më konkret, më të dobishëm dhe më të realizueshëm për bashkëqytetarët tanë. Le ta nisim këtë fushatë si kurrë më parë, duke pranuar që ne të debatojmë për Lushnjën dhe për të mirën e lushnjarëve tanë”, shtoi ai.
Gjatë fjalës së tij, Idrit Sefa u bëri apel qytetarëve për pjesëmarrje në votime dhe respekt ndaj njeri-tjetrit pavarësisht ndasive politike.
Këtë të Shtunë nisi fushata për zgjedhjet e pjesshme vendore të 6 marsit në 6 bashkitë e vendit.
