Dy persona janë arrestuar dhe një i tretë është shpallur në kërkim në kuadër të operacionit “Lumthi”, që çoi në sekuestrimin e një pistolete, municion luftarak dhe doza me lëndë narkotike.
Në pranga u vunë Bledar Gjeta, 38 vjeç dhe Agustin Lika, 43 vjeç, banues në Rrëshen, Mirditë.
Ndërsa në kërkim u shpall Elidion Gjoka, 33 vjeç, banues në Mirditë.
Policia njoftoi se operacioni mbrëmjen e djeshme erdhi “bazuar në informacionet e marra në rrugë operative se në vendin e quajtur ‘Ura e Fanit’, Mirditë, një shtetas qarkullonte me automjet, me armë zjarri pa leje dhe doza me lëndë narkotike gati për shitje”.
Sipas të njëjtave burime, efektivët kanë lokalizuar dhe ndaluar mjetin e dyshuar tip “Audi” me drejtues Gjokën, ku gjatë kontrollit kanë gjetur dhe sekuestruar në cilësinë e provës materiale një armë zjarri pistoletë, municion luftarak dhe lëndë të dyshuar narkotike e dyshuar kokainë.
Në vijim të veprimeve u arrestuan Bledar Gjeta dhe Agustin Lika, si dhe u shpall në kërkim drejtuesi i mjetit Elidion Gjoka, i cili duke përfituar nga errësira ka mundur të largohet.
Ky i fundit akuzohet mëtejshme për veprat penale “Armëmbajtja pa leje” dhe “Prodhimi dhe shitja e narkotikëve”, ndërsa dy të tjerët për veprën penale “Përkrahja e autorit të krimit”.
