Shkrimtari Bardhyl Londo është ndarë nga jeta, në moshën 74-vjeçare, pas betejës me një sëmundje të rëndë.
Bardhyl Londo, shkrimtar, poet dhe autor këngësh, studioi për gjuhë dhe letërsi në Universitetin e Tiranës.
Pas mbarimit të fakultetit ai punoi për disa vite mësues në Përmet dhe më pas për gazetën letrare “Drita”. Për disa kohë ka qenë kryetar i “Lidhjes së Shkrimtarëve dhe Artistëve” (LSHA).
Krijimtaria e tij letrare përfshin 8 vëllime me poezi si edhe disa romane.
Është fitues i çmimit “Migjeni”.
Bardhyl Londo ka qenë edhe deputet i Partisë Demokratike.
