Policia e Gjirokastrës ka arrestuar dy persona për shpërndarjen e lëndëve narkotike në doza.
Në kuadër të këtij operacioni u arrestuan në flagrancë shtetasit Ervis.C., 30 vjeç, banues në Gjirokastër dhe Herolind. H., 36 vjeç, banues në Gjirokastër.
Në vendin e quajtur “Ura e lumit”, gjatë kontrollit fizik shtetasit Ervis. C. iu gjetën disa doza me lëndë të dyshuar narkotike cannabis sativa. Nga verifikimet e kryera rezultoi se ky shtetas drejtonte automjetin, pa leje drejtimi.
Gjatë kontrollit të ushtruar në banesën e shtetasit Ervis. C., u konstatua shtetasi Herolind. H., të cilit iu gjetën doza me lëndë të dyshuar narkotike kokainë.
Më tej, kontrolli nga shërbimet e Policisë ka vijuar në biznesin (dyqan tabacco) në pronësi të shtetasit Herolind. H., ku u gjetën 60 doza me lëndë narkotike të dyshuar cannabis sativa gati për shpërndarje, 260 gramë lëndë narkotike e dyshuar cannabis sativa, një peshore, 22 paketa cigaresh pa pullë fiskale, 6 qese me duhan të grirë pa pullë fiskale dhe 11 pako me duhan të grirë pa pullë fiskale, të cilat u sekuestruan në cilësinë e provës materiale, së bashku me automjetin dhe 5 aparate celulare.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprat penale “Prodhimi dhe shitja e narkotikëve”, “Ruajtja apo depozitimi i mallrave kontrabandë”, “Përshtatja e lokalit për përdorim droge” dhe “Drejtim i automjetit në mënyrë të parregullt”, njoftoi policia.
