Përmes një deklarate, partia e Lulzim Bashës, i është përgjigjur atyre që i konsideron si sulme të nongratave të shpallur dhe të pashpallur, ndaj Komisionit hetimor për Inceneratorët.
Në deklaratën e bërë publike, e cila vjen në një kohë kur një nga anëtarët e Komisionit të Rithemelimit, Edmond Spaho, u largua nga Komisioni Hetimor me argumentin se është e pamundur zbardhja e fakteve për shkak të qëndrimit të mbajtur nga deputetët e PS, thuhet se “partia e re e Nongratave të shpallur dhe të pashpallur, doli në mbrojtje të vjedhjes me aferën e inceneratorëve.
Deklarata gjithashtu u përgjigjet akuzave të LSI ndaj kryetares së Komisionit, Jorida Tabaku, të cilën e akuzojnë për gënjeshtrat lidhur me qëndrimin e kësaj partie ndaj aferës së inceneratorëve.
“Non grata të shpallura dhe të pashpallura, janë bërë bashkë në mbrojtje të korrupsionit të inceneratorëve, dhe në mbrojtje të ministrave e zyrtarëve që pritet të shkojnë në burg.
Komisioni hetimor ka nxjerrë para shqiptarëve të vërtetën e madhe se si janë vjedhur miliona euro me bekimin e Edi Ramës.
Komisioni hetimor po fakton çdo ditë me dokumentete përfshirjen e ministrave dhe ish ministrave. Kjo si duket ka shqetësuar shumë ortakët e tyre nga partia e re e Ilirit dhe Nongrates.
PD do vazhdojë ta bëjë detyrën e saj, për të zbardhur me fakte se si janë vjedhur shqiptarët dhe kush ka përfituar nga kjo vjedhje.
Inkurajojmë SPAK të veprojë pa humbur kohë e te çojë para drejtësisë, urdhëruesit, abuzuesit, shpërdoruesit dhe përfituesit e 430 milion eurove të marra nga xhepat e shqiptarëve.
Edi Rama është i korruptuar. Qeveria e tij është e korruptuar. Me këta në krye, Shqipëria nuk mund të këtë zhvillim. Shqiptarët duhet ta braktisin të shkuarën dhe të korruptuarit”, thuhet në deklaratë.
